திருப்பதி ஏழுமலையான் கோயில் பிரம்மோற்சவ விழாவின் 3-ம் நாள் நிகழ்ச்சிகள் நேற்று நடைபெற்றன.
கடந்த 15-ம் தேதி கொடியேற்றத்துடன் தொடங்கிய பிரம்மோற்சவத்தின் 3-ம் நாளான நேற்று காலை, மலையப்பர் சுவாமி சிம்ம வாகனத்தில் யோக முத்திரையில் எழுந்தருளி பக்தர்களுக்கு அருள்பாலித்தார்.
சிம்ம வாகனத்தில் எழுந்தருளிய மலையப்பர் சுவாமியை திரளான பக்தர்கள் தரிசனம் செய்தனர். இதையொட்டி திருமலையின் மாட வீதிகளில் சிறப்பு நிகழ்ச்சிகள் நடைபெற்றன.
ஜீயர் குழுவினர் பங்கேற்றதுடன், யானை, குதிரை, காளை உள்ளிட்ட பரிவட்டங்களும் இடம்பெற்றன. மேலும், 8 மாநிலங்களைச் சேர்ந்த குழுவினரின் நடன நிகழ்ச்சிகளும் நடைபெற்றன.
இரவு நடைபெற்ற வாகன சேவையில், ஸ்ரீதேவி மற்றும் பூதேவி சமேதமாக மலையப்பர் முத்துப்பல்லக்கு வாகனத்தில் எழுந்தருளி, 4 மாட வீதிகளில் பவனி வந்து பக்தர்களுக்கு அருள்பாலித்தார்.
இன்று புரட்டாசி மாதம் பிறப்பதால், திருப்பதி ஏழுமலையானை தரிசிக்க திருமலைக்கு வரும் பக்தர்களின் எண்ணிக்கை அதிகரித்து வருகிறது.
புரட்டாசி மாதத்தையொட்டி திருப்பதி கோயிலில் பக்தர்கள் கூட்டம் தொடர்ந்து அதிகரிக்கும் நிலையில், பிரம்மோற்சவ விழா நிகழ்ச்சிகளும் தொடர்ந்து நடைபெற உள்ளன.