ஜெய்ப்பூர்: ராஜஸ்தான் உள்ளாட்சித் தேர்தல் முடிவுகள் வெளியாகியுள்ள நிலையில், குதிரை பேரத்தைத் தடுக்கும் நடவடிக்கையாக விடுதிகளில் தங்கவைக்கப்பட்டிருந்த ஜெய்ப்பூர் மாநகராட்சி காங்கிரஸ் வேட்பாளர்களில் சிலர், அறைகள் மற்றும் உணவு போதுமானதாக இல்லை எனக் கூறி வீடு திரும்பியுள்ளனர்.
ஜெய்ப்பூர் மாநகராட்சியின் பல்வேறு வார்டுகளில் போட்டியிட்ட பாஜக மற்றும் காங்கிரஸ் வேட்பாளர்கள், செப்டம்பர் 12-ம் தேதி வாக்குப்பதிவு முடிந்த மறுநாளே வெவ்வேறு விடுதிகளுக்கு அழைத்துச் செல்லப்பட்டனர்.
காங்கிரஸ் வேட்பாளர்கள் பாசியில் உள்ள நயி கா நாத் தாம் அருகேயுள்ள அசிதிரியா ரிசார்ட்டிலும், பாஜக வேட்பாளர்கள் டெல்லி சாலையில் உள்ள பன்வார் ரிசார்ட்டிலும் தங்கவைக்கப்பட்டனர்.
முதலில் செப்டம்பர் 21-ம் தேதி மேயர் வேட்பாளர்களுக்கான வேட்புமனு தாக்கல் நடைபெறும் என எதிர்பார்க்கப்பட்டதால், அதுவரை தேவையான உடைகள் மற்றும் பொருட்களை எடுத்துவருமாறு வேட்பாளர்களிடம் கூறப்பட்டிருந்தது.
இந்நிலையில், மலவியா நகர், சாங்கானேர், பாக்ரு உள்ளிட்ட சட்டப்பேரவைத் தொகுதிகளைச் சேர்ந்த சில காங்கிரஸ் வேட்பாளர்கள், தங்குமிடம் மற்றும் உணவு வசதிகள் போதுமானதாக இல்லை எனக் கூறி செப்டம்பர் 12-ம் தேதி இரவு விடுதியிலிருந்து வெளியேறினர்.
அல்வார் பகுதியைச் சேர்ந்த காங்கிரஸ் வேட்பாளர்களும் அதே விடுதியில் தங்கவைக்கப்பட்டதால் அறைகள் பற்றாக்குறை ஏற்பட்டதாக சில வேட்பாளர்கள் தெரிவித்தனர். குழந்தைகளுடன் வந்த பெண் வேட்பாளர்கள் கூடுதல் சிரமங்களை எதிர்கொண்டதாகவும் கூறப்பட்டது.
வீட்டில் இரவு உணவு சாப்பிடாமல் விடுதிக்கு வந்த சில வேட்பாளர்களுக்கு போதிய உணவு கிடைக்கவில்லை எனவும் புகார் எழுந்தது. சிலர் வெளியேற முயன்றபோது பாதுகாப்புப் பணியாளர்கள் தடுத்ததாகவும், பின்னர் அவர்களுக்கு அனுமதி வழங்கப்பட்டதாகவும் தெரிவிக்கப்பட்டுள்ளது.
ஆரம்பத்தில் சில ஏற்பாட்டுக் குறைபாடுகள் இருந்ததாகவும், தற்போது அனைத்து ஏற்பாடுகளும் சரிசெய்யப்பட்டுள்ளதாகவும் காங்கிரஸ் தரப்பில் தெரிவிக்கப்பட்டுள்ளது.
ஜெய்ப்பூர் மாநகராட்சியின் 150 இடங்களில் இதுவரை பாஜக 78 இடங்களிலும், காங்கிரஸ் 53 இடங்களிலும் வெற்றி பெற்றுள்ளது.