சத்தீஸ்கர் மாநிலம் பஸ்தர் மாவட்டத்தில் 2013-ம் ஆண்டு நடைபெற்ற ஜீரம் காட் மாவோயிஸ்ட் தாக்குதல் வழக்கில் 10 பேருக்கு மரண தண்டனை விதிக்கப்பட்டுள்ளது.
ஜக்தல்பூரில் உள்ள சிறப்பு தேசிய புலனாய்வு அமைப்பு (NIA) நீதிமன்றம் புதன்கிழமை இந்தத் தண்டனையை அறிவித்தது. குற்றச் சதி மற்றும் கொலை உள்ளிட்ட பிரிவுகளின் கீழ் குற்றவாளிகளுக்கு தண்டனை வழங்கப்பட்டுள்ளது.
2013 மே 25-ம் தேதி சுக்மாவில் நடைபெற்ற காங்கிரஸ் கட்சியின் பரிவர்த்தன் யாத்திரை நிகழ்ச்சியில் பங்கேற்றவர்கள் திரும்பிச் சென்ற வாகன அணிவகுப்பை 150-க்கும் மேற்பட்ட மாவோயிஸ்ட்கள் தாக்கினர்.
தாக்குதலில் காங்கிரஸ் மூத்த தலைவர் மகேந்திர கர்மா, மாநில காங்கிரஸ் தலைவர் நந்தகுமார் படேல், அவரது மகன் தினேஷ் மற்றும் முன்னாள் எம்எல்ஏ உதய் முதலியார் உள்ளிட்டோர் உயிரிழந்தனர். மொத்தம் 27 பேர் கொல்லப்பட்டதுடன், 38 பேர் காயமடைந்தனர். உயிரிழந்தவர்களில் 10 பாதுகாப்புப் படையினரும் இடம்பெற்றிருந்தனர்.
வாகன அணிவகுப்பு செல்லும் பாதையில் கண்ணிவெடி வெடிக்கச் செய்து சாலையை மறித்த மாவோயிஸ்ட்கள், சுமார் இரண்டு மணி நேரம் துப்பாக்கிச் சூடு மற்றும் கையெறி குண்டுத் தாக்குதலை நடத்தினர்.
இந்த வழக்கில் பிரமிளா மோடியம், சைது லேகம் என்ற முன்னா, சுமிதா என்ற புனேம் மோடியம், முக்கா மாண்டவி, கோசா கவாசி என்ற கோசாரம், ஆயதா மார்க்கம், மத்காமி தேவா, ஜோகா மத்காமி, பஞ்சாமி சன்னா என்ற சாம்ரு மற்றும் மகாதேவ் நாக் ஆகிய 10 பேருக்கு மரண தண்டனை விதிக்கப்பட்டுள்ளது.
வழக்கில் கைது செய்யப்பட்ட 11 பேரில் ஒருவர் விசாரணையின்போது உயிரிழந்தார். குற்றப்பத்திரிகையில் இடம்பெற்ற மேலும் 28 பேர் தலைமறைவாக இருப்பதாக தெரிவிக்கப்பட்டுள்ளது.
இந்த வழக்கின் விசாரணை ஒரு தசாப்தத்துக்கும் மேலாக நடைபெற்றது. மொத்தம் 294-க்கும் மேற்பட்ட விசாரணை அமர்வுகளுக்குப் பிறகு தீர்ப்பு வழங்கப்பட்டுள்ளது.