என்ஐஏ கோரிக்கையை ஏற்று சிறப்பு நீதிமன்றம் உத்தரவு; கூடுதல் குற்றப்பத்திரிகையிலும் பெயர் இடம்பெற்றது
ஜம்மு: பஹல்காம் தீவிரவாத தாக்குதல் வழக்கில், லஷ்கர்-இ-தொய்பா அமைப்பின் தலைவர் ஹபீஸ் சயீத் மீது ஜாமீனில் வெளிவர முடியாத கைது வாரண்டை (Non-Bailable Warrant) ஜம்முவில் உள்ள தேசிய புலனாய்வு முகமை (NIA) சிறப்பு நீதிமன்றம் பிறப்பித்துள்ளது.
கடந்த ஆண்டு ஏப்ரல் 22 அன்று, தெற்கு காஷ்மீரின் பஹல்காம் (Pahalgam, Jammu & Kashmir) பகுதியில் நடைபெற்ற தீவிரவாத தாக்குதலில் சுற்றுலாப் பயணிகள் உட்பட 26 பேர் உயிரிழந்தனர். இந்த வழக்கில் பாகிஸ்தானில் வசித்து வரும் லஷ்கர்-இ-தொய்பா அமைப்பின் தலைவர் ஹபீஸ் சயீத்திற்கு எதிராக தேசிய புலனாய்வு முகமை (NIA) அண்மையில் கூடுதல் குற்றப்பத்திரிகையை தாக்கல் செய்தது.
வழக்கின் அடுத்தகட்ட விசாரணையை முன்னெடுக்க ஹபீஸ் சயீதுக்கு எதிராக ஜாமீனில் வெளிவர முடியாத கைது வாரண்ட் பிறப்பிக்க வேண்டும் என்று என்ஐஏ நீதிமன்றத்தில் கோரிக்கை விடுத்திருந்தது.
இந்த கோரிக்கையை ஏற்றுக்கொண்ட சிறப்பு நீதிமன்றம், "நியாயமான, முழுமையான மற்றும் பயனுள்ள விசாரணைக்காக குற்றம் சாட்டப்பட்டவரை கைது செய்து காவலில் விசாரிப்பது அவசியம்" எனக் குறிப்பிட்டு, ஹபீஸ் சயீதுக்கு எதிராக ஜாமீனில் வெளிவர முடியாத கைது வாரண்டை பிறப்பித்தது.
மேலும், அந்த வாரண்டை சட்டப்படி நிறைவேற்றுவதற்காக ஜம்முவில் உள்ள என்ஐஏ அதிகாரிகளுக்கு நீதிமன்றம் அனுப்பி வைத்துள்ளது.
இந்தியா மற்றும் அமெரிக்கா சர்வதேச தீவிரவாதியாக அறிவித்துள்ள ஹபீஸ் சயீத், 2008-ஆம் ஆண்டு மும்பை தீவிரவாத தாக்குதலின் முக்கிய சதித் திட்டமிட்டவர்களில் ஒருவராகக் கருதப்படுகிறார். பஹல்காம் தாக்குதல் வழக்கின் கூடுதல் குற்றப்பத்திரிகையில், அவரது பெயர் தனிப்பட்ட முறையிலும், தடை செய்யப்பட்ட லஷ்கர்-இ-தொய்பா மற்றும் தி ரெசிஸ்டன்ஸ் ஃபிரண்ட் (TRF) அமைப்புகளின் தலைவராகவும் இடம்பெற்றுள்ளது.