சென்னை | ஜூலை 7, 2026
நெம்மேலி கடல்நீரை குடிநீராக்கும் ஆலை வளாகத்தில் முன்னாள் முதல்வர் மு.க. ஸ்டாலின் பெயர் பொறிக்கப்பட்டிருந்த கல்வெட்டு அகற்றப்பட்டதாக எழுந்துள்ள சர்ச்சை தொடர்பாக, ஒரு வாரத்திற்குள் மீண்டும் அதே இடத்தில் கல்வெட்டு நிறுவப்படாவிட்டால் திமுக சார்பில் மிகப்பெரிய போராட்டம் நடத்தப்படும் என முன்னாள் அமைச்சர் தா.மோ. அன்பரசன் எச்சரிக்கை விடுத்துள்ளார்.
சென்னையில் செய்தியாளர்களை சந்தித்த அவர், கடந்த திமுக ஆட்சியில் ரூ.1,516.82 கோடி மதிப்பில் நெம்மேலியில் நாளொன்றுக்கு 150 மில்லியன் லிட்டர் திறன் கொண்ட இரண்டாவது கடல்நீரை குடிநீராக்கும் திட்டத்தை அப்போதைய முதல்வர் மு.க. ஸ்டாலின் தொடங்கி வைத்ததாக தெரிவித்தார்.
தென்சென்னை மற்றும் செங்கல்பட்டு மாவட்ட மக்களுக்கு குடிநீர் வழங்கும் முக்கியத் திட்டத்தை நினைவுகூரும் வகையில் அமைக்கப்பட்டிருந்த மு.க. ஸ்டாலின் பெயர் பொறித்த கல்வெட்டு தற்போதைய அரசால் அகற்றப்பட்டுள்ளதாக அவர் குற்றம்சாட்டினார்.
இதுகுறித்து அதிகாரிகளிடம் விளக்கம் கேட்டபோது, பராமரிப்புப் பணிகள் காரணமாக கல்வெட்டு அகற்றப்பட்டுள்ளதாகவும், ஒரு வாரத்திற்குள் மீண்டும் அதே இடத்தில் நிறுவப்படும் என்றும் உறுதியளித்ததாக தா.மோ. அன்பரசன் கூறினார். அந்த உறுதி நிறைவேற்றப்படாவிட்டால் திமுக சார்பில் மாநிலம் முழுவதும் போராட்டம் நடத்தப்படும் என்றும் எச்சரித்தார்.
மேலும், தற்போதைய அரசு புதிய திட்டங்களை செயல்படுத்தாமல், முந்தைய ஆட்சியில் தொடங்கப்பட்ட திட்டங்களை மட்டுமே தொடர்ந்து செயல்படுத்தி வருவதாகவும் அவர் விமர்சித்தார். டிஎன்பிஎஸ்சி மூலம் 401 பேருக்கு பணி நியமனம், பத்திரப்பதிவுத் துறையின் 'ஸ்டார் 3.0' திட்டம் உள்ளிட்டவை திமுக ஆட்சியில் உருவாக்கப்பட்டவை என்றும் அவர் குறிப்பிட்டார்.
'நான் முதல்வன்' திட்டத்தின் பெயர் மாற்றப்பட்டுள்ளதாகவும், அதில் பயனடைந்த மாணவர்களின் காணொளிகள் இணையத்திலிருந்து நீக்கப்பட்டுள்ளதாகவும் குற்றம்சாட்டிய அவர், அரசு புதிய திட்டங்களில் கவனம் செலுத்த வேண்டும் என்றும் வலியுறுத்தினார்.
மேலும், தவெக எம்எல்ஏ சரவணன் தொடர்பான பாலியல் புகார் விவகாரத்திலும் பல்வேறு குற்றச்சாட்டுகளை தா.மோ. அன்பரசன் முன்வைத்தார்.
குறிப்பு: இந்த குற்றச்சாட்டுகளுக்கு தொடர்புடைய தரப்பினரின் பதில் வெளியாகவில்லை.
— TN PRESS NEWS
🌐 https://www.tnpress.in/
🌐 www.tamilnews.in
🌐 www.bhayamariyaan.com
📱 X | Facebook | ShareChat | Dailyhunt : @Tnpresstv
