சென்னை, ஜூலை 6:
தனியார் பள்ளிகள் தொடர்பாக பள்ளிக் கல்வித்துறை அமைச்சர் ராஜ்மோகன் தெரிவித்த கருத்துகளை விமர்சித்துள்ள நாம் தமிழர் கட்சியின் தலைமை ஒருங்கிணைப்பாளர் சீமான், "அமைச்சர் தனியார் பள்ளிகளுக்கு மட்டும்தான் அமைச்சரா? அல்லது அரசுப் பள்ளிகளுக்கும் அமைச்சரா?" என்று கேள்வி எழுப்பியுள்ளார்.
இதுகுறித்து அவர் வெளியிட்டுள்ள அறிக்கையில், தனியார் பள்ளிகளுக்கான உரிமங்களை முழுமையாக இணையதளம் மூலம் பெறும் நடைமுறையை வரவேற்கும் வகையில் அமைச்சர் பேசியதுடன், தனியார் பள்ளி நிர்வாகிகளின் சிரமங்கள் குறித்து கருத்து தெரிவித்திருப்பது பல்வேறு சந்தேகங்களை ஏற்படுத்துவதாக கூறியுள்ளார்.
தனியார் பள்ளிகளில் அதிக கட்டண வசூல், உரிமம் வழங்கும் நடைமுறைகள் மற்றும் கல்விக் கட்டண கட்டுப்பாடு போன்ற விவகாரங்களில் அரசு உரிய நடவடிக்கை எடுக்க வேண்டும் என்றும், அதேசமயம் அரசுப் பள்ளிகளின் அடிப்படை வசதிகள் மற்றும் கல்வித் தரத்தை மேம்படுத்துவதிலும் அரசு கூடுதல் கவனம் செலுத்த வேண்டும் என்றும் அவர் வலியுறுத்தியுள்ளார்.
மேலும், மாநிலம் முழுவதும் பல அரசுப் பள்ளிகளில் மேற்கூரை, கழிப்பறை, குடிநீர், பாதுகாப்புச் சுவர், ஆய்வகங்கள் மற்றும் விளையாட்டு மைதானங்கள் உள்ளிட்ட அடிப்படை வசதிகள் போதுமான அளவில் இல்லை என்றும், ஆயிரக்கணக்கான ஆசிரியர் பணியிடங்கள் காலியாக உள்ளதாகவும் சீமான் தெரிவித்துள்ளார்.
ஒப்பந்த அடிப்படையில் பணியாற்றும் ஆசிரியர்களுக்கு பணி நிரந்தரம் மற்றும் உரிய ஊதியம் வழங்குதல், காலியாக உள்ள ஆசிரியர் பணியிடங்களை விரைந்து நிரப்புதல் உள்ளிட்ட நடவடிக்கைகளை தமிழக அரசு மேற்கொள்ள வேண்டும் என்றும் அவர் கோரிக்கை விடுத்துள்ளார்.
அரசுப் பள்ளிகளில் மாணவர் சேர்க்கையை அதிகரிக்கவும், கல்வி உள்கட்டமைப்பை மேம்படுத்தவும் அரசு முன்னுரிமை அளிக்க வேண்டும் என்றும், தனியார் பள்ளிகள் மீது காட்டப்படும் அக்கறையை அரசுப் பள்ளிகளின் வளர்ச்சியிலும் வெளிப்படுத்த வேண்டும் என்றும் சீமான் தனது அறிக்கையில் வலியுறுத்தியுள்ளார்.
