ஜகார்த்தா:
இந்தியா–இந்தோனேசியா உறவை மேலும் வலுப்படுத்தும் முக்கிய முன்னேற்றமாக, இந்தோனேசியாவில் இந்திய மேலாண்மை நிறுவனம் பெங்களூரு (IIM Bangalore)-வின் முதல் சர்வதேச வளாகம் அமைக்கப்படும் என பிரதமர் நரேந்திர மோடி ஜகார்த்தாவில் அதிகாரப்பூர்வமாக அறிவித்தார்.
இந்தோனேசியா, ஆஸ்திரேலியா மற்றும் நியூசிலாந்து ஆகிய நாடுகளுக்கான அரசு முறை சுற்றுப்பயணத்தின் முதல் கட்டமாக ஜகார்த்தா சென்ற பிரதமர் மோடியை, இந்தோனேசிய அதிபர் பிரபோவோ சுபியான்டோ சிறப்பாக வரவேற்றார். பின்னர் நடைபெற்ற இருதரப்பு பேச்சுவார்த்தையில் கல்வி, பாதுகாப்பு, செயற்கை நுண்ணறிவு (AI), தொழில்நுட்பம், விண்வெளி, டிஜிட்டல் பொருளாதாரம் உள்ளிட்ட பல்வேறு துறைகளில் ஒத்துழைப்பை விரிவுபடுத்த இரு நாடுகளும் முடிவு செய்தன.
பேச்சுவார்த்தைக்குப் பிறகு பிரதமர் மோடி, "இந்தியா–இந்தோனேசியா உறவுகளில் இது ஒரு புதிய பொற்காலத்தின் தொடக்கம்" என்று குறிப்பிட்டார்.
இந்தோனேசியாவில் IIM பெங்களூரு வளாகம்
இந்திய உயர்கல்வியை உலகளவில் விரிவுபடுத்தும் முயற்சியாக, IIM பெங்களூருவின் முதல் சர்வதேச வளாகம் இந்தோனேசியாவில் நிறுவப்பட உள்ளது. இதன் மூலம் ஆசியான் (ASEAN) பிராந்திய மாணவர்கள் உலகத் தரத்திலான மேலாண்மைக் கல்வியை பெறும் வாய்ப்பு உருவாகும் என தெரிவிக்கப்பட்டுள்ளது.
பாதுகாப்புத் துறையில் முக்கிய ஒப்பந்தங்கள்
இந்தியா–ரஷ்யா கூட்டுத் தயாரிப்பான பிரம்மோஸ் க்ரூஸ் ஏவுகணை மற்றும் இந்தியாவின் உள்நாட்டு தயாரிப்பான அஸ்ட்ரா வான் வழி ஏவுகணைகளை இந்தோனேசியாவுக்கு வழங்குவதற்கான ஒப்பந்தங்கள் இறுதி செய்யப்பட்டுள்ளன. இதன் மூலம், பிலிப்பைன்ஸுக்கு அடுத்ததாக பிரம்மோஸ் ஏவுகணையை பெறும் இரண்டாவது ஆசியான் நாடாக இந்தோனேசியா உருவாகிறது.
AI, UPI மற்றும் விண்வெளி ஒத்துழைப்பு
செயற்கை நுண்ணறிவு, தொலைத்தொடர்பு, ஸ்டார்ட்அப் சூழல் மற்றும் டிஜிட்டல் பொதுக்கட்டமைப்பு துறைகளில் இணைந்து செயல்பட இரு நாடுகளும் ஒப்புக்கொண்டுள்ளன.
மேலும், இந்தியாவின் UPI டிஜிட்டல் கட்டண முறை மற்றும் இந்தோனேசியாவின் கட்டண அமைப்பை ஒருங்கிணைக்கும் நடவடிக்கைகளும் தொடங்கப்படுகின்றன. விண்வெளி ஆராய்ச்சி, தொழில்நுட்பப் பகிர்வு மற்றும் புதுமை முயற்சிகளிலும் கூட்டாண்மை வலுப்படுத்தப்பட உள்ளது.
உருக்கு ஆலை மற்றும் பொருளாதார கூட்டாண்மை
இந்தியாவின் SAIL நிறுவனமும், இந்தோனேசியாவின் PT Krakatau Steel நிறுவனமும் இணைந்து புதிய உருக்கு உற்பத்தி ஆலையை அமைக்க முடிவு செய்துள்ளன. அதோடு, முக்கிய கனிமங்கள், அரிய வகை காந்தங்கள் மற்றும் விநியோகச் சங்கிலி மேம்பாட்டிலும் இரு நாடுகளும் இணைந்து செயல்பட உள்ளன.
உணவு பாதுகாப்பு மற்றும் மக்கள் நலத் திட்டங்கள்
இந்தியாவின் மதிய உணவுத் திட்டம், பொதுவிநியோக அமைப்பு போன்ற மக்கள் நலத் திட்டங்களின் அனுபவங்களை பகிர்ந்து கொள்ளவும், இந்தியாவில் உருவாக்கப்பட்ட உயர்தர கோதுமை விதைகளை இந்தோனேசியாவுக்கு வழங்கவும் இரு நாடுகளும் ஒப்புக்கொண்டுள்ளன.
பிரதமர் மோடிக்கு இந்தோனேசியாவின் உயரிய விருது
இந்தோனேசிய அரசு வழங்கும் உயரிய குடிமக்கள் விருதான 'பிந்தாங் அதிபூர்ணா' விருது பிரதமர் நரேந்திர மோடிக்கு அதிபர் பிரபோவோ சுபியான்டோ வழங்கி கவுரவித்தார்.
இந்த விருது, இந்திய மக்களுக்கும் இந்தியா–இந்தோனேசியா இடையேயான நீண்டகால நட்புறவுக்கும் கிடைத்த அங்கீகாரம் என பிரதமர் மோடி தெரிவித்தார். இந்த விருது இதற்கு முன் ஜவகர்லால் நேரு, நெல்சன் மண்டேலா மற்றும் ஃபிடல் காஸ்ட்ரோ உள்ளிட்ட உலகத் தலைவர்களுக்கு வழங்கப்பட்டிருப்பது குறிப்பிடத்தக்கது.
