கொழும்பு: இலங்கையின் மேற்கு கடற்கரை நகரமான நீகும்போ சிறையில் கைதிகள் இடையே ஏற்பட்ட வன்முறை மோதலில் 2 பேர் உயிரிழந்ததுடன், 34 பேர் படுகாயமடைந்துள்ளனர். இந்த சம்பவம் அங்கு பெரும் பரபரப்பை ஏற்படுத்தியுள்ளது.
சுமார் 1,800 கைதிகள் அடைக்கப்பட்டுள்ள நீகும்போ சிறையில், போதைப்பொருள் கடத்தல் தொடர்பான இரண்டு கைதி குழுக்களுக்கிடையே ஏற்பட்ட மோதல் திடீரென வன்முறையாக மாறியது. இதில் 2 கைதிகள் உயிரிழந்தனர். மேலும் பலர் காயமடைந்த நிலையில், 34 பேர் தீவிர சிகிச்சைக்காக மருத்துவமனைக்கு அனுப்பப்பட்டுள்ளனர்.
இதற்கிடையில், சிறையில் டெங்கு காய்ச்சல் பரவி வருவதாகக் கூறி, பெண் கைதிகள் குழு ஒன்று சிறைக் கட்டிடத்தின் மேற்கூரையில் ஏறி போராட்டத்தில் ஈடுபட்டது. இதனால் சிறை வளாகத்தில் பதற்றமான சூழல் நிலவியது.
நிலையை கட்டுக்குள் கொண்டு வர இலங்கை காவல்துறையின் சிறப்பு அதிரடிப்படை விரைந்து சென்று பாதுகாப்பு நடவடிக்கைகளை மேற்கொண்டது. சம்பவம் தொடர்பாக அதிகாரிகள் தீவிர விசாரணை நடத்தி வருகின்றனர்.
