ராமேசுவரம்: இலங்கை சிறையில் அடைக்கப்பட்டுள்ள தமிழக மீனவர்களை உடனடியாக விடுவிக்கக் கோரி ராமேசுவரம் விசைப்படகு மீனவர்கள் காலவரையற்ற வேலைநிறுத்தப் போராட்டத்தை தொடங்கியுள்ளனர்.
ராமேசுவரம் மீன்பிடித் துறைமுகத்தில் இருந்து கடலுக்குச் சென்ற தமிழக மீனவர்களை இலங்கை கடற்படையினர் கைது செய்து, நீதிமன்றக் காவலில் சிறையில் அடைத்துள்ளனர். தொடர்ந்து தமிழக மீனவர்கள் கைது செய்யப்படுவதற்கு மீனவர் சங்கங்கள் எதிர்ப்பு தெரிவித்து வருகின்றன.
இலங்கை சிறையில் உள்ள மீனவர்களையும், அந்நாட்டு அதிகாரிகளால் பறிமுதல் செய்யப்பட்டுள்ள விசைப்படகுகளையும் உடனடியாக விடுவிக்க வேண்டும் என மீனவர்கள் வலியுறுத்தியுள்ளனர்.
இக்கோரிக்கையை வலியுறுத்தி ராமேசுவரம் விசைப்படகு மீனவர்கள் கடலுக்குச் செல்லாமல் வேலைநிறுத்தத்தில் ஈடுபட்டுள்ளனர். இதனால் ஏராளமான விசைப்படகுகள் மீன்பிடித் துறைமுகத்தில் நிறுத்தி வைக்கப்பட்டுள்ளன.
தமிழக மீனவர்கள் தொடர்ந்து கைது செய்யப்படும் பிரச்சினைக்கு நிரந்தரத் தீர்வு காண மத்திய, மாநில அரசுகள் நடவடிக்கை எடுக்க வேண்டும் என்றும் மீனவர்கள் கோரிக்கை விடுத்துள்ளனர்.
மேலும், இந்தியா - இலங்கை மீனவர்களுக்கு இடையே பேச்சுவார்த்தை நடத்தி நீண்டகாலமாக நிலவி வரும் பிரச்சினைக்கு தீர்வு காண வேண்டும் என்றும் வலியுறுத்தப்பட்டுள்ளது.
இலங்கை சிறையில் உள்ள தமிழக மீனவர்களை விடுவிப்பதுடன், பறிமுதல் செய்யப்பட்டுள்ள விசைப்படகுகளையும் மீட்டு உரிய உரிமையாளர்களிடம் ஒப்படைக்க மத்திய, மாநில அரசுகள் நடவடிக்கை எடுக்க வேண்டும் என மீனவர் சங்கங்கள் தெரிவித்துள்ளன.