தாராபுரம்: பெண்களை இழிவாகவும் அவதூறாகவும் பேசுபவர்களுக்கு மக்கள் வாக்களித்து ஆதரவளிக்கக் கூடாது என்று தமிழக வெற்றிக் கழகத் தலைவர் விஜய் தெரிவித்துள்ளார்.
திருப்பூர் மாவட்டம் தாராபுரம் தொகுதி இடைத்தேர்தல் பிரச்சாரத்தின் கடைசி நாளான அக்டோபர் 4-ம் தேதி விஜய் தாராபுரத்தில் ரோடு ஷோ நடத்தி வாக்கு சேகரித்தார். கோவையில் இருந்து ஹெலிகாப்டர் மூலம் தாராபுரம் வந்த அவர், பிரச்சார வேனில் பயணித்து பொதுமக்களை சந்தித்தார்.
தாராபுரம் நகரின் மையப் பகுதியில் திரண்டிருந்த மக்களிடம் பேசிய விஜய், திமுக மற்றும் அதன் கூட்டணிக் கட்சிகளுக்கு வாக்களிப்பது பெண்களை அவதூறாகப் பேசுபவர்களுக்கு ஆதரவளிப்பதற்கு சமம் என்று கூறினார்.
வீட்டில் உள்ள தாய்மார்கள் மற்றும் சகோதரிகளை தரக்குறைவாகப் பேசுபவர்களை எந்தக் காலத்திலும் மன்னிக்கக் கூடாது என்றும் அவர் தெரிவித்தார்.
தன்னைப் பற்றி யார் என்ன விமர்சனம் செய்தாலும் பொறுத்துக்கொள்வேன் என்றும், ஆனால் பெண்கள், தாய்மார்கள் மற்றும் சகோதரிகளை இழிவாகப் பேசினால் சும்மா இருக்க மாட்டேன் என்றும் விஜய் கூறினார்.
சமீபத்தில் தாராபுரம் வந்த திமுக தலைவர் மு.க.ஸ்டாலின் மற்றும் அவரது மகன் பேசிய கருத்துகள் அதிர்ச்சியளிப்பதாகவும், தவெக வேட்பாளர் சத்யபாமா குறித்து அவர்கள் பேசிய வார்த்தைகள் மிகவும் மோசமாக இருந்ததாகவும் விஜய் குற்றம்சாட்டினார்.
இடைத்தேர்தலில் திமுகவினருக்கு மக்கள் தக்க பாடம் புகட்ட வேண்டும் என்றும் அவர் கேட்டுக்கொண்டார்.
பிரச்சாரத்தின்போது விஜய் ரேக்ளா வண்டியில் சிறிது தூரம் பயணம் செய்தார். மூலனூர் பகுதியில் விவசாயிகள் மற்றும் தொழிலாளர்களை சந்தித்த அவர், முருங்கைத் தோப்புக்குச் சென்று முருங்கைக் காய்களைப் பறித்தார். பின்னர் மூலனூர் வஞ்சியம்மன் கோயிலில் வழிபாடு செய்து, சாலையில் நடந்து சென்று பொதுமக்களிடம் வாக்கு சேகரித்தார்.