பிரதமர் நரேந்திர மோடியின் பிறந்தநாளையொட்டி, ரஷ்ய அதிபர் விளாடிமிர் புதின் மற்றும் இத்தாலி பிரதமர் ஜார்ஜியா மெலோனி வாழ்த்து தெரிவித்துள்ளனர்.
மோடியின் பிறந்தநாளை முன்னிட்டு, டெல்லியில் உள்ள ரஷ்ய தூதரகம் புதினின் வாழ்த்துச் செய்தியை வெளியிட்டுள்ளது.
அதில், இந்திய மக்களிடையே பிரதமர் மோடி ஆழ்ந்த மரியாதையைப் பெற்றிருப்பதாகவும், சர்வதேச அளவில் குறிப்பிடத்தக்க செல்வாக்கைக் கொண்டிருப்பதாகவும் புதின் தெரிவித்துள்ளார்.
இந்தியா–ரஷ்யா இடையிலான சிறப்பு மற்றும் ராஜதந்திர கூட்டாண்மையை வலுப்படுத்துவதில் மோடியின் தனிப்பட்ட பங்களிப்பு முக்கியமானது என்றும் அவர் குறிப்பிட்டுள்ளார்.
கடந்த வாரம் டெல்லி வந்தபோது தனக்கும் தனது குழுவினருக்கும் சிறப்பான வரவேற்பு அளித்ததற்காக மோடிக்கு புதின் நன்றி தெரிவித்துள்ளார். இரு தலைவர்களுக்கும் இடையிலான பேச்சுவார்த்தை முக்கியத்துவம் வாய்ந்ததாகவும் வெளிப்படையாகவும் இருந்ததாக அவர் கூறியுள்ளார்.
மோடியின் அரசியல் விவேகம் மற்றும் தொலைநோக்குப் பார்வையையும் புதின் பாராட்டியுள்ளார். இந்தியா–ரஷ்யா இடையிலான இருதரப்பு மற்றும் சர்வதேச விவகாரங்களில் ஆக்கப்பூர்வமான ஒத்துழைப்பை தொடர்ந்து முன்னெடுக்க விருப்பம் தெரிவித்துள்ள அவர், இரு நாடுகளின் நலனுக்காக இணைந்து செயல்படுவோம் என்றும் கூறியுள்ளார்.
இத்தாலி பிரதமர் ஜார்ஜியா மெலோனியும் சமூக வலைதளம் மூலம் மோடிக்கு பிறந்தநாள் வாழ்த்து தெரிவித்துள்ளார்.
தனது நண்பரான பிரதமர் மோடிக்கு நல்ல உடல்நலம், ஆற்றல் மற்றும் வெற்றி கிடைக்க வாழ்த்துவதாக மெலோனி குறிப்பிட்டுள்ளார்.
இந்தியா–இத்தாலி இடையிலான ஆழமான நட்புறவு தொடர்ந்து வலுப்பெற்று வருவதாகவும், இரு நாடுகளின் ஒத்துழைப்பு மற்றும் வளமான எதிர்காலத்துக்காக இணைந்து செயல்பட்டு வருவதாகவும் அவர் தெரிவித்துள்ளார்.