கேரளா: கேரளத்தின் கோட்டயம் மாவட்டத்தைச் சேர்ந்த 3 கத்தோலிக்க கன்னியாஸ்திரிகள் தங்கள் சபையிலிருந்து விலக்கப்பட்ட நிலையில், தையல் தொழில் மூலம் தங்களது வாழ்க்கையை மீண்டும் கட்டியெழுப்பி வருகின்றனர்.
ஸ்ரீ ராணித் எம்.ஜே., ஸ்ரீ ஆல்ஃபி மற்றும் ஸ்ரீ அன்சிட்டா ஆகிய மூவரும் இணைந்து ‘ஸ்டாண்ட் பை மீ’ என்ற ஆடைத் தயாரிப்பு முயற்சியைத் தொடங்கியுள்ளனர்.
2018-ம் ஆண்டு பிஷப் பிராங்கோ முலக்கல் மீது ஸ்ரீ ராணித் அளித்த பாலியல் வன்கொடுமை புகாரைத் தொடர்ந்து, அவர்களது சபையுடனான உறவில் பிரச்சினைகள் ஏற்பட்டன. பின்னர் மூவரும் வழக்கமான வாழ்வாதார உதவியைப் பெற முடியாத சூழல் ஏற்பட்டது.
இந்த நிலையில், மன அழுத்தத்திலிருந்து விடுபட தையல் பணியில் ஈடுபடத் தொடங்கிய அவர்கள், பின்னர் அதையே தங்களது வாழ்வாதாரமாக மாற்றினர். இரவு உடைகள், சல்வார் கமீஸ், பைகள் உள்ளிட்ட பல்வேறு பொருட்களைத் தயாரித்து வருகின்றனர்.
‘சிஸ்டர்ஸ் இன் சாலிடாரிட்டி’ என்ற ஆதரவுக் குழுவினரும், பல்வேறு நலன்விரும்பிகளும் தையல் இயந்திரங்கள், துணிகள் உள்ளிட்ட தேவையான பொருட்களை வழங்கி அவர்களுக்கு உதவினர்.
தையல் பணியுடன் காய்கறிகளைப் பயிரிடுவதும், கோழிகளை வளர்ப்பதுமாக தங்களது அன்றாட வாழ்க்கைச் செலவுகளை சமாளித்து வருகின்றனர்.
‘ஸ்டாண்ட் பை மீ’ முயற்சி தற்போது கேரளாவில் கவனம் பெற்றுள்ளது. உள்ளூர் கண்காட்சிகளிலும் அவர்கள் தயாரிப்புகளை விற்பனை செய்து வருகின்றனர்.
தானமாக உதவி பெறுவதைவிட, சுயமாக உழைத்து கண்ணியத்துடன் வாழ்வதே தங்களது விருப்பம் என தெரிவிக்கும் அவர்கள், தங்களது பணியின் மூலம் வாழ்க்கையை தொடர்ந்து முன்னெடுத்து வருகின்றனர்.