மழைக்கு வாய்ப்பு – சென்னை வானிலை ஆய்வு மையம் தகவல்

 சென்னை: தமிழகத்தில் நாளை (ஜூலை 11) முதல் ஜூலை 16-ம் தேதி வரை மேற்கு தொடர்ச்சி மலை மாவட்டங்கள் மற்றும் சில பகுதிகளில் மிதமான மழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது. அதே நேரத்தில், தமிழகத்தின் பல்வேறு உள்மாவட்டங்களில் வெப்பநிலையும் வழக்கத்தை விட உயரக்கூடும் என எச்சரிக்கப்பட்டுள்ளது.

சென்னை வானிலை ஆய்வு மையம் வெளியிட்டுள்ள அறிவிப்பின்படி, வட தமிழக கடலோரப் பகுதிகளை ஒட்டி சுமார் 0.9 கி.மீ. உயரத்தில் காற்றழுத்த தாழ்வு பாதையும், தெலங்கானாவிலிருந்து கர்நாடக கடலோரம் வழியாக மத்திய கிழக்கு அரபிக்கடல் வரை 1.5 முதல் 3.1 கி.மீ. உயரத்தில் மற்றொரு காற்றழுத்த தாழ்வு பாதையும் நிலவுகிறது. இதன் தாக்கத்தால் தமிழகத்தில் மழைக்கான சூழல் உருவாகியுள்ளது.

ஜூலை 11: மேற்கு தொடர்ச்சி மலை மாவட்டங்களில் ஓரிரு இடங்களில் இடி, மின்னல் மற்றும் பலத்த காற்றுடன் கூடிய மிதமான மழை பெய்ய வாய்ப்புள்ளது. மற்ற மாவட்டங்களில் லேசான மழை பெய்யக்கூடும்.

ஜூலை 12 முதல் 14 வரை: மேற்கு தொடர்ச்சி மலை மாவட்டங்களில் ஓரிரு இடங்களில் மிதமான மழை தொடரும். பிற பகுதிகளில் பெரும்பாலும் வறண்ட வானிலை நிலவும்.

ஜூலை 15: மேற்கு தொடர்ச்சி மலை மாவட்டங்களில் லேசானது முதல் மிதமான மழை பெய்யக்கூடும். மற்ற மாவட்டங்களில் வறண்ட வானிலை நீடிக்கும்.

ஜூலை 16: மேற்கு தொடர்ச்சி மலை மாவட்டங்கள் மற்றும் வட தமிழக கடலோரப் பகுதிகளில் ஓரிரு இடங்களில் லேசானது முதல் மிதமான மழை பெய்ய வாய்ப்புள்ளது.

இதனுடன், ஜூலை 12 முதல் 14 வரை தமிழகத்தின் சில பகுதிகளில் அதிகபட்ச வெப்பநிலை வழக்கத்தைவிட சுமார் 5 டிகிரி ஃபாரன்ஹீட் வரை அதிகரிக்கக்கூடும் என்றும் வானிலை மையம் தெரிவித்துள்ளது.

சென்னை மற்றும் புறநகர் பகுதிகளில், நாளை வானம் ஓரளவு மேகமூட்டத்துடன் காணப்படும். நகரின் சில பகுதிகளில் இடி, மின்னலுடன் கூடிய லேசான மழை பெய்ய வாய்ப்புள்ளது. அதிகபட்ச வெப்பநிலை 100°F (சுமார் 38°C) மற்றும் குறைந்தபட்ச வெப்பநிலை 82°F (சுமார் 28°C) அளவில் பதிவாகக்கூடும்.

கடந்த 24 மணி நேரத்தில் பதிவான மழை அளவுகளின்படி, நீலகிரி மாவட்டம் குன்னூரில் 6 செ.மீ. மழை பதிவாகியுள்ளது. சென்னை அம்பத்தூர், விண்ட்வொர்த் எஸ்டேட் மற்றும் தஞ்சாவூர் மாவட்டம் எச்சன்விடுதியில் தலா 5 செ.மீ., சென்னை கொரட்டூர், கோவை சின்னக்கல்லார், சோலையார், திருவள்ளூர் மற்றும் பள்ளிப்பட்டில் தலா 4 செ.மீ. மழை பதிவாகியுள்ளது.

மழை மற்றும் இடியுடன் கூடிய வானிலை நிலவும் பகுதிகளில் பொதுமக்கள் மற்றும் விவசாயிகள் தேவையான முன்னெச்சரிக்கை நடவடிக்கைகளை மேற்கொள்ளுமாறு வானிலை ஆய்வு மையம் அறிவுறுத்தியுள்ளது.