யூரியா கடத்தலை தடுக்க தவறிய அதிகாரிகள் மீது நடவடிக்கை எடுக்க வேண்டும்: தமிழ்நாடு விவசாயிகள் சங்கம் வலியுறுத்தல்

 சென்னை: விவசாயிகளுக்காக மானிய விலையில் வழங்கப்படும் யூரியா உரத்தை முறைகேடாக தொழிற்சாலைகளுக்கு கடத்திய சம்பவம் தொடர்பாக, கண்காணிப்பில் அலட்சியம் காட்டிய வேளாண்துறை அதிகாரிகள் மீது கடும் நடவடிக்கை எடுக்க வேண்டும் என்று தமிழ்நாடு விவசாயிகள் சங்கத்தின் பொதுச் செயலாளர் பி.எஸ். மாசிலாமணி வலியுறுத்தியுள்ளார்.

இதுகுறித்து அவர் வெளியிட்டுள்ள அறிக்கையில், அரசு மானியத்தில் வழங்கப்படும் யூரியா உர மூட்டைகள் சட்டவிரோதமாக வாங்கப்பட்டு, அவற்றை உருக்கி மரப்பலகை தொழிலில் பயன்படுத்தப்படும் திரவ யூரியா (Glue Binder) தயாரிக்கும் தொழிற்சாலைகள் பல ஆண்டுகளாக இயங்கி வந்தது அதிர்ச்சியளிப்பதாக தெரிவித்துள்ளார்.

கோவை மாவட்டம் மதுக்கரை அருகே திருமலையாம்பாளையம் – தமனாம்பாறை பகுதியில் செயல்பட்டு வந்த ஒரு தொழிற்சாலையில் ஆயிரத்திற்கும் மேற்பட்ட யூரியா உர மூட்டைகள், பாய்லர்கள், கன்வேயர் பெல்ட் அமைப்புகள் மற்றும் விறகுகள் பதுக்கி வைக்கப்பட்டிருந்ததாகவும், அங்கிருந்து தினமும் டேங்கர் லாரிகள் மூலம் திரவ யூரியா கேரளாவுக்கு அனுப்பப்பட்டதாகவும் கூறப்பட்டுள்ளது.

இந்த முறைகேடு, பொதுமக்கள் மற்றும் விவசாயிகள் சந்தேகத்தின் பேரில் லாரிகளை தடுத்து நிறுத்தியபோதுதான் வெளிச்சத்துக்கு வந்ததாகவும், பின்னர் போலீசார், வருவாய்துறை மற்றும் வேளாண்துறை அதிகாரிகள் சோதனை நடத்தி மானிய யூரியா மூட்டைகளை பறிமுதல் செய்ததாகவும் அறிக்கையில் குறிப்பிடப்பட்டுள்ளது.

மேலும், பிச்சனூர் பகுதியில் இதேபோன்ற மற்றொரு சட்டவிரோத ஆலை இயங்கி வந்ததாக விவசாயிகள் கண்டறிந்துள்ளதாகவும் தெரிவிக்கப்பட்டுள்ளது.

அதிகாரிகளின் அலட்சியம் குறித்து கேள்வி

யூரியா உர விநியோகத்தை கண்காணிக்க வேளாண்துறையில் தனி அதிகாரிகள் இருந்தும், ஆயிரக்கணக்கான மானிய உர மூட்டைகள் எப்படி தொழிற்சாலைகளுக்கு சென்றது? உரிய அனுமதியின்றி தொழிற்சாலைகள் எப்படி இயங்கின? சம்பந்தப்பட்ட கண்காணிப்பு அதிகாரிகள் என்ன செய்தனர்? என்ற கேள்விகளை பி.எஸ். மாசிலாமணி எழுப்பியுள்ளார்.

விவசாயிகள் சங்கத்தின் கோரிக்கைகள்

தமிழ்நாடு விவசாயிகள் சங்கம் சார்பில் அவர் முன்வைத்துள்ள முக்கிய கோரிக்கைகள்:

• மானிய யூரியா கடத்தலை தடுக்க தவறிய வேளாண்துறை அதிகாரிகள் மீது ஒழுங்கு நடவடிக்கை எடுக்க வேண்டும்.
• சட்டவிரோதமாக தொழிற்சாலைகளை நடத்தியவர்கள் மற்றும் யூரியா உரத்தை சப்ளை செய்தவர்கள் மீது குற்றவியல் வழக்குகள் பதிவு செய்து கடுமையான தண்டனை வழங்க வேண்டும்.
• தமிழ்நாடு முழுவதும் இதுபோன்ற சட்டவிரோத ஆலைகளை கண்டறிய சிறப்பு ஆய்வுகள் மேற்கொள்ள வேண்டும்.

குறிப்பு: மேற்கண்ட கருத்துகள் தமிழ்நாடு விவசாயிகள் சங்கத்தின் பொதுச் செயலாளர் பி.எஸ். மாசிலாமணி வெளியிட்டுள்ள அறிக்கையில் இடம்பெற்றுள்ளவை.