செப்டம்பர் 15-ல் 'தாய் மாமன் தங்க மோதிரம்' திட்டத்தை முதல்வர் விஜய் தொடங்கி வைக்கிறார்
தமிழக அரசு மருத்துவமனைகளில் பிறக்கும் குழந்தைகளுக்கு 1 கிராம் (22 கேரட், 916 ஹால்மார்க்) தங்க மோதிரம் வழங்கும் 'தாய் மாமன் தங்க மோதிரம்' திட்டத்தை செயல்படுத்தும் பணிகள் தீவிரமடைந்துள்ளன. இதற்காக தமிழ்நாடு மருத்துவ சேவைகள் கழகம் (TNMSC) சார்பில் தங்க மோதிரங்கள் கொள்முதல் செய்ய டெண்டர் அறிவிப்பு வெளியிடப்பட்டுள்ளது.
தமிழக சட்டப்பேரவைத் தேர்தலின் போது வழங்கப்பட்ட முக்கிய வாக்குறுதிகளில் ஒன்றாக இருந்த இந்தத் திட்டத்தை, மறைந்த முன்னாள் முதல்வர் அண்ணாவின் பிறந்த நாளான செப்டம்பர் 15 அன்று தமிழக முதல்வர் விஜய் தொடங்கி வைக்க உள்ளதாக அரசு தெரிவித்துள்ளது.
அரசு வெளியிட்டுள்ள அரசாணையின்படி, தமிழகத்தில் நிரந்தரமாக வசிக்கும் குடும்பங்களைச் சேர்ந்த தாய்மார்கள் அரசு மருத்துவமனைகளில் குழந்தை பெற்றால், அந்தக் குழந்தைக்கு அரசு சார்பில் 1 கிராம் தங்க மோதிரம் வழங்கப்படும்.
தமிழர் பாரம்பரியத்தில் குழந்தை பிறந்தவுடன் தாயின் சகோதரர் (தாய் மாமன்) தங்கம் உள்ளிட்ட பரிசுகளை வழங்கும் மரபை நினைவுகூரும் வகையில் இந்தத் திட்டம் வடிவமைக்கப்பட்டுள்ளது. அரசு, தாய் மாமனின் பங்கை ஏற்று குழந்தையை அன்புடன் வரவேற்கும் அடையாளமாக இந்த மோதிரத்தை வழங்குகிறது.
இந்தத் திட்டத்தை செயல்படுத்த தமிழக அரசு ஆண்டுதோறும் ரூ.755.83 கோடி நிதியை ஒதுக்கியுள்ளது. மேலும், ஜூன் 22 முதல் அரசு மருத்துவமனைகளில் பிறக்கும் குழந்தைகள் இந்தத் திட்டத்தின் பயனை பெறுவார்கள் என்று தெரிவிக்கப்பட்டுள்ளது.
திட்டத்திற்காக மொத்தம் 4,41,667 தங்க மோதிரங்கள் கொள்முதல் செய்யப்பட உள்ளன. இவை அனைத்தும் 22 கேரட் (916 ஹால்மார்க்) தரத்தில் இருக்க வேண்டும் என டெண்டர் நிபந்தனையில் குறிப்பிடப்பட்டுள்ளது.
டெண்டரில் பங்கேற்க விரும்பும் நிறுவனங்கள் ஆகஸ்ட் 17 வரை விண்ணப்பிக்கலாம். ஆகஸ்ட் 18 அன்று டெண்டர் திறக்கப்படும். விண்ணப்பதாரர்கள் ரூ.50 லட்சம் முன்பணமாக செலுத்த வேண்டும் என்றும் அறிவிக்கப்பட்டுள்ளது.
டிசம்பர் மாதம் வரை தேவையான மோதிரங்கள் இந்த ஆண்டு ஆகஸ்ட் மற்றும் செப்டம்பர் மாதங்களில் வழங்கப்பட வேண்டும். அடுத்த ஆண்டு மார்ச், ஏப்ரல் மற்றும் மே மாதங்களுக்கான மோதிரங்கள் திட்டமிட்ட கட்டங்களாக வழங்கப்பட வேண்டும் என்றும் டெண்டர் ஆவணத்தில் குறிப்பிடப்பட்டுள்ளது.