சென்னை: தமிழகத்தில் ஜூலை 7 முதல் ஜூலை 12 வரை பல்வேறு பகுதிகளில் லேசானது முதல் மிதமான மழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது. குறிப்பாக, மேற்கு தொடர்ச்சி மலை மாவட்டங்களில் பலத்த காற்றுடன் மழை பெய்யக்கூடும் எனவும் அறிவிக்கப்பட்டுள்ளது.
வானிலை ஆய்வு மையம் வெளியிட்டுள்ள அறிவிப்பில், வடமேற்கு வங்கக்கடலில் உருவான ஆழ்ந்த காற்றழுத்த தாழ்வு மண்டலம், மேற்கு – வடமேற்கு திசையில் நகர்ந்து, வடக்கு ஒடிசா மாநிலத்தின் பாலசோர் அருகே கரையை கடந்ததாக தெரிவிக்கப்பட்டுள்ளது.
எந்தெந்த பகுதிகளில் மழை?
- ஜூலை 7 மற்றும் 8: மேற்கு தொடர்ச்சி மலை மாவட்டங்களில் ஓரிரு இடங்களில் பலத்த காற்றுடன் மிதமான மழை பெய்ய வாய்ப்பு.
- தமிழகத்தின் பிற மாவட்டங்கள் மற்றும் புதுச்சேரி, காரைக்கால் பகுதிகளில் லேசான மழை பெய்யக்கூடும்.
- ஜூலை 9 முதல் 12 வரை: மேற்கு தொடர்ச்சி மலை மாவட்டங்களில் லேசானது முதல் மிதமான மழையும், பிற மாவட்டங்களில் ஓரிரு இடங்களில் லேசான மழையும் பெய்யக்கூடும்.
சென்னை வானிலை
சென்னை மற்றும் புறநகர் பகுதிகளில் வானம் ஓரளவு மேகமூட்டத்துடன் காணப்படும். நகரின் சில பகுதிகளில் லேசான மழை பெய்ய வாய்ப்புள்ளதாக வானிலை மையம் தெரிவித்துள்ளது.
- அதிகபட்ச வெப்பநிலை: சுமார் 100°F (37–38°C)
- குறைந்தபட்ச வெப்பநிலை: சுமார் 84°F (29°C)
மீனவர்களுக்கு எச்சரிக்கை
மத்திய வங்கக்கடலின் பெரும்பாலான பகுதிகள் மற்றும் தெற்கு வங்கக்கடலின் சில பகுதிகளில் மணிக்கு 40 முதல் 50 கி.மீ. வேகத்தில், இடையிடையே 60 கி.மீ. வேகத்தில் சூறாவளிக் காற்று வீசக்கூடும் என்பதால், அந்த பகுதிகளுக்கு மீனவர்கள் கடலுக்குச் செல்ல வேண்டாம் என அறிவுறுத்தப்பட்டுள்ளது.
அதிகபட்ச மழைப்பதிவு
கடந்த 24 மணி நேரத்தில், நீலகிரி மாவட்டம் கூடலூர் சந்தையில் 3 செ.மீ. மழை பதிவாகியுள்ளது. மேலும், மேல் கூடலூர், குன்னூர், செருமுள்ளி, வுட்பிரையர் எஸ்டேட் மற்றும் பார்வுட் பகுதிகளில் தலா 2 செ.மீ. மழை பதிவாகியுள்ளதாக வானிலை ஆய்வு மையம் தெரிவித்துள்ளது.
