ஓசூர்: தொழிலாளர்களின் வேலைநிறுத்த உரிமையைப் பாதுகாக்கும் வகையில், டிசம்பர் மாதம் முதல் நாடு தழுவிய அளவில் தொடர் வேலைநிறுத்தம் மற்றும் மறியல் போராட்டங்கள் நடத்தத் திட்டமிட்டுள்ளதாக ஏஐடியுசி அகில இந்திய பொதுச் செயலாளர் அமர்ஜித் கவுர் தெரிவித்துள்ளார்.
ஓசூரில் நடைபெற்ற ஏஐடியுசியின் 21-வது மாநில மாநாட்டில் பங்கேற்ற அவர், செய்தியாளர்களிடம் பேசும்போது இதனைத் தெரிவித்தார்.
தேர்தல் ஆணையத்தை மத்திய அரசு தவறாகப் பயன்படுத்துவதாகவும், வாக்காளர் பட்டியலில் முறைகேடுகளை மேற்கொள்ள முயற்சிப்பதாகவும் அமர்ஜித் கவுர் குற்றம்சாட்டினார். இதுபோன்ற நடவடிக்கைகள் மக்களின் ஜனநாயக உரிமைகளைப் பறிப்பதாக அவர் தெரிவித்தார்.
தேர்தல் ஆணையர்கள் நியமனத்துக்கான தேர்வுக் குழுவிலிருந்து உச்ச நீதிமன்றத் தலைமை நீதிபதியை நீக்கியதன் மூலம், தங்களுக்குச் சாதகமான அதிகாரிகளை நியமிக்க மத்திய அரசு வழிவகுத்துள்ளதாகவும் அவர் விமர்சித்தார். இதனால் தேர்தல் ஆணையத்தின் சுதந்திரம் பாதிக்கப்பட்டுள்ளதாகவும் கூறினார்.
2024 மக்களவைத் தேர்தலில் பாஜக தனிப்பெரும்பான்மை பெறாதபோதும், கூட்டணிக் கட்சிகளின் ஆதரவுடன் ஆட்சி நடத்தி வருவதாக அவர் குறிப்பிட்டார். டெல்லியில் போராட்டங்களைக் கட்டுப்படுத்தும் நோக்கில் மெட்ரோ ரயில் சேவைகள் நிறுத்தப்படுதல், ரயில்கள் ரத்து செய்யப்படுதல், போராட்டக்காரர்கள் கைது செய்யப்படுதல் போன்ற நடவடிக்கைகள் மேற்கொள்ளப்படுவதாகவும் குற்றம்சாட்டினார்.
தொகுதி மறுவரையறை மற்றும் மக்கள்தொகைக் கணக்கெடுப்பு என்ற பெயரில், கல்வி, சுகாதாரம் மற்றும் மனிதவளக் குறியீடுகளில் முன்னேறிய தென் மாநிலங்களின் மக்களவைப் பிரதிநிதித்துவத்தைக் குறைக்க மத்திய அரசு திட்டமிடுவதாகவும் அவர் தெரிவித்தார். இதற்கு எதிராக அனைத்துக் கட்சிகளும் பொதுமக்களும் ஒன்றிணைய வேண்டும் என்று வலியுறுத்தினார்.
தொழிலாளர்களின் வேலைநிறுத்த உரிமையைப் பாதுகாக்கும் நோக்கில், மத்தியத் தொழிற்சங்கங்கள் விவசாய சங்கங்களுடன் இணைந்து டிசம்பர் முதல் நாடு முழுவதும் தொடர் வேலைநிறுத்தம் மற்றும் மறியல் போராட்டங்களை முன்னெடுக்கத் திட்டமிட்டுள்ளதாக அமர்ஜித் கவுர் தெரிவித்தார்.