இங்கிலாந்தில் வசிக்கும் இந்திய வம்சாவளியைச் சேர்ந்த 11 வயது சிறுமி போதனா சிவானந்தன், செஸ் விளையாட்டில் சர்வதேச மாஸ்டர் (IM) பட்டத்திற்கான தகுதிகளைப் பெற்று வரலாற்றுச் சாதனை படைத்துள்ளார். இதன் மூலம், இந்தப் பட்டத்திற்கான தகுதியைப் பெற்ற உலகின் இளம் பெண் வீராங்கனை என்ற பெருமையை அவர் பெற்றுள்ளார்.
லண்டனின் வடக்குப் பகுதியில் உள்ள ஹாரோவில் வசிக்கும் போதனாவின் குடும்பம் தமிழ்நாட்டைப் பூர்வீகமாகக் கொண்டது. அவரது தந்தை திருச்சிராப்பள்ளியைச் சேர்ந்தவர்.
மான்டெனெக்ரோ நாட்டின் புத்வா நகரில் நடைபெற்ற 2026 ஐரோப்பிய மகளிர் செஸ் கிளப் கோப்பைப் போட்டியில், ‘She Plays to Win Lionesses’ அணிக்காகப் போதனா விளையாடினார்.
இறுதிச் சுற்றில் ஸ்வீடன் வீராங்கனை விக்டோரியா ஜோஹன்சனை 32 நகர்த்தல்களில் வீழ்த்தியதன் மூலம், சர்வதேச மாஸ்டர் பட்டத்திற்குத் தேவையான மூன்றாவது மற்றும் இறுதி தகுதி நெறியைப் பெற்றார். ஏழு ஆட்டங்களில் 5.5 புள்ளிகளையும் அவர் எடுத்தார்.
இதற்கு முன்பு, ஹங்கேரியைச் சேர்ந்த புகழ்பெற்ற செஸ் வீராங்கனை ஜூடித் போல்கார் 1988-ம் ஆண்டு தனது 12-வது வயதில் இந்தச் சாதனையைப் படைத்திருந்தார். தற்போது 11 வயது, 7 மாதங்கள் மற்றும் 16 நாட்களில் போதனா அந்தச் சாதனையை முறியடித்துள்ளார்.
சர்வதேச மாஸ்டர் பட்டத்திற்கான தகுதிகளைப் பெற்றதுடன், உலகின் மிக இளம் வயதில் இந்தத் தகுதியைப் பெற்ற வீரர்கள் பட்டியலில் முதல் 10 இடங்களுக்குள்ளும் போதனா இடம்பெற்றுள்ளார்.
ஏற்கெனவே மகளிர் கிராண்ட்மாஸ்டர் பட்டத்திற்கான தகுதிகளை மிக இளம் வயதில் பெற்றவர் என்ற சாதனையையும் போதனா படைத்துள்ளார். அவரது தொடர்ச்சியான சாதனைகள் சர்வதேச செஸ் அரங்கில் கவனம் பெற்றுள்ளன.