புதுடெல்லி:
பசுமை பட்டாசுகள் பயன்பாட்டால் சுற்றுச்சூழல் மற்றும் பொதுமக்களின் உடல்நலத்திற்கு ஏற்பட்டுள்ள பாதிப்புகள் குறித்து விரிவான அறிக்கையை தாக்கல் செய்ய மத்திய மாசுக்கட்டுப்பாட்டு வாரியத்துக்கு (CPCB) உச்சநீதிமன்றம் உத்தரவிட்டுள்ளது.
பட்டாசுகளால் ஏற்படும் காற்று மாசுபாட்டை கட்டுப்படுத்துவது தொடர்பான வழக்கை விசாரித்த நீதிமன்றம், பசுமை பட்டாசுகள் உண்மையில் சுற்றுச்சூழலுக்கு குறைந்த பாதிப்பை ஏற்படுத்துகிறதா என்பது குறித்து அறிவியல் அடிப்படையிலான ஆய்வு அவசியம் எனக் கருத்து தெரிவித்தது.
இதையடுத்து, பசுமை பட்டாசுகள் பயன்படுத்தப்பட்ட பகுதிகளில் காற்றின் தரம், சுற்றுச்சூழல் பாதிப்பு, பொதுமக்களின் உடல்நல பாதிப்பு மற்றும் மாசுபாட்டின் அளவு தொடர்பான தரவுகளை சேகரித்து முழுமையான அறிக்கையை தாக்கல் செய்ய மத்திய மாசுக்கட்டுப்பாட்டு வாரியத்திற்கு உத்தரவிடப்பட்டது.
அந்த அறிக்கையின் அடிப்படையில் பசுமை பட்டாசுகளின் உற்பத்தி, விற்பனை மற்றும் பயன்பாடு தொடர்பாக தேவையான வழிகாட்டுதல்கள் மற்றும் கட்டுப்பாடுகள் குறித்து பரிசீலனை செய்யப்படும் என்றும் உச்சநீதிமன்றம் தெரிவித்துள்ளது. சுற்றுச்சூழல் பாதுகாப்பு மற்றும் பொதுமக்களின் நலனை கருத்தில் கொண்டு அறிவியல் ஆதாரங்களின் அடிப்படையில் நடவடிக்கைகள் எடுக்கப்பட வேண்டும் என்றும் நீதிமன்றம் வலியுறுத்தியுள்ளது.
