புதுடெல்லி: தேசியப் பாடலான "வந்தே மாதரம்" பாடலை அவமதிப்பது அல்லது அதன் பாடலைத் தடுக்க முயல்வது குற்றமாக்கப்படும் வகையில், அதிகபட்சம் 3 ஆண்டுகள் சிறைத் தண்டனை மற்றும் அபராதம் விதிக்க வழிவகுக்கும் புதிய சட்டத் திருத்த மசோதாவை நாடாளுமன்ற மழைக்கால கூட்டத் தொடரில் மத்திய அரசு தாக்கல் செய்ய உள்ளது.
'தேசிய கௌரவத்திற்கு அவமரியாதை செய்வதைத் தடுக்கும் சட்டம், 1971' (Prevention of Insults to National Honour Act, 1971) சட்டத்தில் திருத்தம் கொண்டு வருவதற்கான இந்த மசோதாவுக்கு மத்திய அமைச்சரவை ஏற்கனவே ஒப்புதல் அளித்துள்ளது.
தற்போது தேசியக் கொடி, தேசிய கீதம் மற்றும் இந்திய அரசியலமைப்பை அவமதிப்பது குற்றமாகக் கருதப்படும் நிலையில், அதே சட்டப் பாதுகாப்பை தேசியப் பாடலான "வந்தே மாதரம்" பாடலுக்கும் வழங்க இந்தத் திருத்தம் முன்மொழியப்பட்டுள்ளது.
இந்த மசோதா சட்டமாக நிறைவேற்றப்பட்டால், வேண்டுமென்றே "வந்தே மாதரம்" பாடலைப் பாடுவதைத் தடுக்குதல், பாடலின் போது இடையூறு விளைவித்தல் அல்லது அவமதித்தல் போன்ற செயல்களுக்கு அதிகபட்சம் 3 ஆண்டுகள் சிறைத் தண்டனை, அபராதம் அல்லது இரண்டும் விதிக்கப்படும்.
வரும் ஜூலை 20 முதல் தொடங்கும் நாடாளுமன்ற மழைக்கால கூட்டத் தொடரில் இந்த மசோதா அறிமுகப்படுத்தப்படும் என எதிர்பார்க்கப்படுகிறது.
